HUMANIZACION DA ESTRADA DE CASTELA.

Castela e Catabois terán árbores a ambas as marxes e beirarrúas de 3,5 metros de ancho.

A humanización da Estrada de Castela e Catabois, na fotografía, primará o tránsito peonil sobre o tráfico rodado

POLO RED. FERROL

A humanización das estradas de Castela e Catabois suporá un cambio radical na configuración destas dúas vías, antes principais accesos rodados á cidade e que hoxe en día, tras a chegada da autoestrada e o Acceso Norte, convertéronse en travesías urbanas. A reforma da estrada de Castela expúxose por primeira vez nos anos 80 do século pasado, durante o primeiro mandato de Manuel Couce Pereiro. Pero é agora cando a mellora desta e da de Catabois desenvolverase.

O último Consello da Xunta aprobou a firma dun convenio co Concello de Ferrol para financiar con oito millóns de euros ambas as actuacións, ao que tamén deu o visto e prace esta semana a Comisión de Urbanismo.

A finais deste ano ou a principios do próximo arrincará a transformación das estradas de Castela e Catabois, segundo o calendario que manexan a área local de Urbanismo e a Consellería de Política Territorial.

O seguinte paso será aprobar no pleno ordinario de agosto o protocolo de colaboración coa administración autonómica co fin de asinalo en setembro, e entre novembro e decembro ter listos os proxectos construtivos para sacar a concurso as obras, que levarán a cabo de forma paralela nos dous viarios.

A proposta definitiva da intervención recollerá os aspectos do anteproxecto no que durante sete meses traballaron ambas as administracións.

Neste estudo previo contémplase a mesma actuación para a estrada de Castela -limitada aos 1.580 metros que esta percorre polo termo municipal de Ferrol- e o tramo máis urbano de Catabois, entre a praza de Canido e a glorieta do hospital Arquitecto Marcide.

Así, a renovación das dúas calzadas inclúe beirarrúas de tres metros e medio de ancho, fronte aos aproximadamente dous metros das actuais.

A consecuencia desta mellora perderanse ao redor de 40 prazas de aparcadoiro en Castela e ata 70 en Catabois, que o concelleiro de Planificación e Xestión Urbanística, Anxo Mato (PSOE), confía en que as absorban as rúas adxacentes.

Así mesmo, para paliar esta diminución de estacionamentos o edil avanzou que o seu departamento planifica dotar dun parking subterráneo con capacidade para 450 coches a zona de Ultramar.

Outra das consecuencias da ampliación das beirarrúas será a expropiación e derriba de seis vivendas en estado ruinoso en Catabois.

A ampliación das zonas verdes será outro dos eixos sobre o que virará o proxecto de humanización.

O anteproxecto contempla dúas aliñacións de árbores ás marxes de cada unha das estradas, plantados a unha distancia entre eles de 25 metros, o que dá unha idea da importante cantidade de masa arbórea coa que se ornamentarán estes equipamentos viarios.

Así mesmo, o estudo previo propón a redución do número de carrís para o tráfico rodado na estrada de Castela, que pasaría de catro a dous, aínda que se mantería o dobre sentido de circulación.

Tamén desaparece a mediana que hoxe se observa nalgúns tramos da vía. Mato apuntou que esta formulación obrigará a reordenar o tránsito de vehículos, eliminando, se é posible, os xiros cara ás rúas adxacentes, apuntou.

Ademais, co obxectivo de mellorar a accesibilidade, evitaranse os desniveis entre as beirarrúas e os pasos de peóns, que quedarán elevados á mesma altura que os bordos.

Por outra banda, o anteproxecto inclúe a incorporación, na estrada de Catabois, dun tramo de carril bici que permitirá dar continuidade aos que xa dispón a cidade.

A idea do Concello e a Xunta é que esta infraestrutura parta da Casa do Coronel, inmoble situado na parcela do Sánchez Aguilera, e prolónguese ata a rotonda do hospital Arquitecto Marcide, o que suma case dous quilómetros de percorrido.

O coordinador de Urbanismo sinalou que a execución destes proxectos favorecerá o uso peonil e comercial das dúas estradas. Nesta liña, engadiu que as obras previstas mellorarán o espazo urbano da cidade e consolidarán os dous viarios como avenidas urbanas, similares á de Esteiro.

Novo mobiliario urbano, que ademais de bancos incluirá unha mellora considerable da iluminación e a dotación de fontes en determinados puntos -dixo-, así como a renovación dos servizos -telefonía, gas, instalacións eléctricas, entre outros- completan esta actuación.

En canto ao tramo menos urbano de Catabois, o quilómetro que resta desde o Marcide ata a glorieta que marca o límite con Narón -na zona de Muíño do Vento-, a intervención será menor. Estará orientada á seguridade e comodidade do tráfico.

Diario de Ferrol.-