VISITA CONCELLEIROS URBANISMO ; MEDIO AMBIENTE- MERCADOS ; OBRAS

VISITA CONCELLEIROS AO BARRIO DO INFERNIÑO

Este pasado día 22 de xuño, mantivemos unha xuntanza cos concelleiros de Urbanismo, Obras e Servizos -Mercados, Medio Ambiente.

Recibimos información do inicio das Obras do PARQUE URBANO do INFERNIÑO (PU-14), que comezarán nos vindeiros días.

Esta obra é produto da insistente reivindicación desta Asociación Veciñal, cando presetamos este proxecto na última campaña electoral municipal .

Temos que manifestar a nosa satisfación pola cometida desta obra que significa unha constante demanda para acometer por fin esta obra necesaria para desenvolver este Parque Urbano. Non obstante amosamos nosa protesta en canto a cosntrución dun aparcamento dentro deste Parque , o cal para nós non ten sentido esta actuación en medio dunha zona verde.

Expresamos a nosa satisfación por comezar nos vindeiros días a segunda fase das obras da Rúa Alcalde Usero ate a Praza do Inferniño.
Tamén expresamos nosas esperanzas de principiar as obras de acondicionamento do futuro e pequeno local da avda. de Viveiro, parada de taxis.

Salientamos a nosas reivindicacións de acometer unha actuación integral da PRAZA DO INFERNIÑO, en canto ao traslado do Palco da Música, bancos novos, un enlousado arredor da zona central da Praza, papeleiras entroutras melloras.

Esta Asociación Veciñal O Rosario- Inferniño, queremos aclarar varias cuestións en relación da xestión do Feirón do Inferniño, entendendo que as concellarías de Facenda, Mercados, Seguridade cidadá, Sanidade chegaron ao compromiso de RESCATAR A XESTIÓN E COBRAMENTO deste feirón do Inferniño, relevando destas funcións a A. VV. Ensanche A.

Queremos manifestar que nosas continuadas reivindicacións, en canto a xestión e cobramento deste Feirón do Inferniño están inspiradas na normativa e Ordenanza reguladora de venda ambulante no concello de Ferrol, aprobada polo Pleno do Concello de Ferrol o día 25 de xaneiro de 2001, e publicado no DOP de data 1 de Marzo de 2001.

Dita normativa establece que o Concello de Ferrol será o único responsable de controlar, fiscalizar, conceder licenzas, autorizar os postos de venda ambulante na vía pública e correspondéndolle o Concello de Ferrol o exercicio de todas estas competencias, así mesmo fixará as TAXAS que terán que aboar polo exercicio da actividade en Dominio Público.

Será o concello quen controle as persoas autorizadas a realizar a venda ambulante, previa Alta de Seguridade Social, estar ao día nas obrigas fiscais ou Facenda Pública, Póliza de responsabilidade civil, cumprimento nos requisitos sanitarios, rexistro de comerciantes ambulantes do Concello de Ferrol e a definitiva AUTORIZACIÓN MUNICIPAL.

Esta TARXETA, conterá a foto e identidade do Titular, modalidade de comercio ambulante e tipo de venda autorizada, selo do negociado de Sanidade, Consumo e Mercados mediante a exposición pública e visible dunha TARXETA.

A Asociación veciñal O Rosario Inferniño, non comparte estas declaracións e facemos un chamamento para que os responsables competentes ASUMAN AS SÚAS COMPETENCIAS e RESPONSABILIDADES.

Se os responsables municipais “CEDEN” ESTA COMPETENCIAS A ENTIDADES PRIVADAS, estamos nun claro exemplo de abandono de funcións e clientelismo populista.

Unha vez máis esta Asociación Veciñal pide ao Concello que se explique con claridade e exerza as súas funcións nesta cuestión.

Por todo isto:

1 .- Esiximos o cumprimento da normativa e Ordenanza en vigor.

2 .- RESCATAR na súa totalidade a XESTIÓN deste Feirón do Inferniño.

3 .- Realizar por parte do concello o COBRAMENTO das TAXAS, segundo a normativa fiscal.
4 .- Investigar e fiscalizar os ingresos cobrados pola A.VV. Ensanche A durante estes últimos 11 anos mediante a comprobación e presentación de memorias económicas, ingresos e gastos. Entendemos que estes ingresos pertencen ao pobo de Ferrol.

5 .- Continuando co punto anterior, pedimos un informe económico sobre a aplicacións da normativa fiscal deste Feirón do Inferniño nos últimos 11 anos.

6 .- Os CARTEIS informativos deste Feirón deben contemplar lendas de publicidade referidas as concellarías competentes do Concello de Ferrol.

7 .- Propoñemos que a realizacións deste FEIRÓN do INFERNIÑO, sexa rotatorio por trimestres nas diversas prazas públicas como son a Praza da Ilustración e Praza de España.

- A Xunta Directiva.

OPOSICIÓN PIDE CAMBIOS APARCAMENTO NO PARQUE URBANO

A oposición esixe ao goberno local que cambie

o proxecto do Palco das Ánimas.

Sábado, 26 de Xuño de 2010

david ruibal garcía

O goberno de Vicente Irisarri terá que reformularse o proxecto de parque urbano do Palco dás Ánimas, no Ensanche A, despois de que no pleno ordinario do pasado xoves saíse adiante unha moción conxunta de Partido Popular (PP) e Independentes por Ferrol (IF) que demanda cambios na urbanización proposta.

A iniciativa contou co respaldo de Bloque Nacionalista Galego (BNG) e Esquerda Unida (EU), deixando só ao grupo de goberno (PSOE), contrario a cambios nunha actuación que foi adxudicada o pasado 10 de maio e que se iniciará o luns ou o martes da próxima semana, segundo anunciou onte o concelleiro de Urbanismo, Anxo Mato.

O Parque urbano Palco das Ánimas é unha das intervencións que acometerá ao longo deste ano o Concello con cargo ao segundo Plan E do Goberno central. Da realización das obras, cun prazo de execución de nove meses, encargarase a empresa Comsa S.A. a mesma que fixo as da praza de España e a urbanización do Bertón e nelas investirase un total de 543.000 euros.

As modificacións a esta actuación que expón os grupos da oposición pasan por que se desestime a construción dun novo aparcadoiro tal e como está proxectado. No seu lugar, queren que se manteña o existente, construído polo Concello en 2006 e que consideran que está en perfecto estado de conservación, sen descartar a ampliación deste se é preciso.

A moción de PP e IF, secundada por BNG e EU, tamén reclama que se elimine o muro de formigón proxectado ao longo dunha parte importante do perímetro exterior que circunda o pavillón deportivo e que se inclúa unha zona de estacionamento en liña na rúa Inferniño, onde desaparecerían os aparcadoiros que hai actualmente.

O responsable das políticas urbanísticas do Concello indicou onte que o executivo solicitará á empresa que redactou o proxecto Consultores de Medio Ambiente e Desenvolvemento S.L, que analice a viabilidade técnica das propostas da oposición, a condición de que a obra non sufra o máis mínimo atraso, engadiu.

Nesta liña, Mato indicou que o acordo plenario non levará paralizar o inicio das obras o luns ou o martes da próxima semana, e reprochou á oposición o feito de que xusto cando están a piques de arrincar as obras póñanse problemas a un proxecto que leva moito tempo encima da mesa.

Así mesmo, indicou que a supresión de aparcadoiros na rúa Inferniño para convertela nunha vía dun único sentido de circulación responde á planificación contemplada no Plan de Mobilidade do Concello.

Para rematar, o titular de Urbanismo recordou que o parque urbano do Palco das Ánimas é unha actuación que demandan desde fai anos os veciños do Ensanche, e que esta é un compromiso incluído no programa de goberno do PSOE.

Diario de Ferrol.-

O CONCELLO XESTIONARÁ E COBRARÁ O FEIRON DO INFERNIÑO.

O Concello asume a xestión do feirón do


Inferniño e o cobro polos postos de venda.

Domingo, 13 de Xuño de 2010.

Con certo retraso sobre as previsións iniciais primeiro barallouse como data xaneiro, o Concello de Ferrol asumiu a xestión do feirón do Inferniño o pasado mes de maio.

Esta era a data de referencia facilitada en marzo polos concelleiros Ramón Veloso e Rafael Fernández Beceiro.

Resólvese así un conflito entre as dúas asociacións de veciños do barrio, a do Ensanche A que se ocupaba desta tarefa e a Asociación Veciñal do Rosario-Inferniño, que viña esixindo reiteradamente que fose o Concello o que se ocupase de organizar esta actividade mercantil, vixiando o cumprimento da normativa e cobrando pola instalación dos postos.

O concelleiro responsable da área de Mercados, Rafael Fernández Beceiro, asegurou que na primeira semana de xestión municipal, onte afrontouse a segunda, non se produciron problemas os aparcadoiros sobre as beirarrúas, que era un dos aspectos máis denunciados, foron practicamente inexistentes e expresou o seu desexo de que non se rexistren novos incidentes, á vez que anunciou que se porán os medios oportunos para que non se invadan as beirarrúas.

Novo padrón-

A asunción destas tarefas por parte do Concello trouxo consigo tamén un novo padrón de vendedores e unha recolocación dos postos que, en principio, non supuxeron problema algún.

Precisamente o cambio de situación dos distintos espazos de venda fíxose para reducir o impacto destes no tráfico e para favorecer a mobilidade na zona.

Na actualidade, o censo de vendedores reduciuse de máis dun centenar a ao redor de sesenta, aínda que desde o negociado de Mercados informouse de que se están producindo novas incorporacións.

A normativa aplicable aos mercadillos establece, así mesmo, que o cobro das taxas realícese de xeito anticipado, algo que tamén se está cumprindo, afrontando os vendedores un pago trimestral en lugar de abonar a tarifa directamente á AVV do Ensanche A como se facía cando se ocupaba de recadar o diñeiro a entidade veciñal

O importe dun posto no mercadillo é de dous euros por metro e día, o mesmo fixado para a feira da cidade a que se celebra unha vez ao mes entre o Cantón e Ferrol Vello e o mercadillo de Recimil e o cobro realízase trimestralmente.

O feirón do Ensanche naceu fai once anos, precisamente a iniciativa da Asociación de Vecinos do Ensanche A e co obxectivo de revitalizar o barrio.

Con todo, a entidade veciñal O Rosario-Inferniño, que circunscribe o seu ámbito de actuación á zona do Inferniño, fixo deste mercadillo un cabalo de batalla, por entender que o seu funcionamento distaba moito de ser o adecuado.

Diario de Ferrol.-

LETRAS GALEGAS

Música Folk

Letras Galegas-2010

Este Venres-21, 21 de maio, un ano máis continuamos coa celelebración das LETRAS GALEGAS-2010.

Despois da participación da veciñanza nesta lectura en galego, pasamos a esta actuación de música Folk-Galega.

Para rematar esta lectura en galego, pasamos a escoitar unha magnífica actuación de Musica Folk a cargo do grupo " ALÉN DE ANCOS" no Palco da Música para ledicia dos asistentes.

Saúdos veciñais e ate o vinderio ano.

A Directiva.-

LETRAS GALEGAS - 2010

Letras Galegas - 2010

A Asociación Veciñal O Rosario- Inferniño, celebra unha vez máis ás Letras Galegas deste ano 2010 cunha lectura en galego, impartida pola veciñanza e unha actuación de música folc do grupo "Alén de Ancos" ao aire libre, Palco da Música.

Varios nenos e nenas participaron nesta lectura galega con temas de autores galegos.

Nosa veciña e poeta Aurora Varela nos acompañou nesta lectura que amablemente participa nestes ultimos anos para celebrar as nosas letras, onde este homenaxeamos ao Poeta Uxío Novoneyra.

Varias e nenos ensaian as súas lecturas...

A presidenta, Ana Jesús López., non podía faltar...

Había bastante animación e compromiso infantil na lectura...

A responsable cultural desta Asociación Veciñal, Merce, tamén participa na lectura.

Continuamos reivindicando que para o vindeiro ano se celebre as Letras 2011 para o ilustre catedrático de lingua galega D. Ricardo Carvalho Calero.

LETRAS GALEGAS-2010 - LECTURA E MUSICA FOLC.-

LECTURA EN GALEGO

A Asociación Veciñal O ROSARIO -INFERNIÑO, convida a cidadanía para celebrar as LETRAS GALEGAS-2010 no PALCO DA MÚSICA da PRAZA DO INFERNIÑO, este VENRES-21 a partir das 6 h. da tarde.

CONVIDAMOS a realizar unha LECTURA EN GALEGO de 2 ou 3 minutos co fin de participar o maior numero de persoas posible.

Animamos aos PEQUENOS/AS , amigos/as e familiares a unha lectura galega.

MUSICA FOLC - GALEGA

Contaremos coa actuación de Música-folc- galega do grupo musical "ALÉN DE ANCOS" a partir das 7,30 horas da tarde.

Saúdos veciñais.

- A Directiva .-

REXEITAMENTO DUN APARCAMENTO PARQUE URBANO

PARQUE URBANO- INFERNIÑO.

Palco das Animas.

NON ao Aparcamento.

A Xunta directiva deste BARRIO DO INFERNIÑO, mantivemos unha xuntanza co Concelleiro de Urbanismo para coñecer polo miúdo o proxecto do PARQUE URBANO do INFERNIÑO.

Queremos manifestar a nosa sorpresa e decepción ao contemplar a construción dun APARCAMENTO dentro deste PARQUE URBANO-PU-14, na confluencia da Rúa Río Xubia con Rúa Seselle.

A Xunta directiva amosa a súa decepción ao considerar este APARCADOIRO totalmente incompatible cunha area verde, recreativa e ecolóxica.

Lembramos que este proxecto foi impulsado por esta asociación na pasada campaña electoral para a consecución dun verdadeiro PARQUE URBANO, pensado para impulsar unha ZONA VERDE necesaria nesta parte do BARRIO DO INFERIÑO.

Esta Asociación Veciñal, REXEITAMOS esta parte do proxecto, polo que pedimos unha MODIFICACIÓN e a total SUPRESIÓN de construír este aparcadoiro co fin de conseguir un verdadeiro PARQUE URBANO, respectando e impulsando o HUMIDAL do lugar.

Ferrol, a 29 de Abril de 2010.

- A Directiva

--
ASOCIACION VECIÑAL O ROSARIO- INFERNIÑO
CIF-G70006473
correo-e: avvorosario@gmail.com
www : orosario-inferninho.blogspot.com

CONTROL DE POMBAS, GAIVOTAS, ESTORNINOS.

Medio Ambiente activa a campaña integral de

control poboacional de gaivotas e pombas .

· O goberno local anuncia a posta en marcha dunha liña telefónica cidadá para solicitar a revisión de tellados.
>

· Un equipo formado por ornitólogos e biólogos elaborarán un censo e retirarán os niños con custe cero para os veciños

Ferrol, 21 de abril de 2010.-
O Concello de Ferrol, a través da Concellería de Medio Ambiente, vén de anunciar a posta en marcha da campaña integral de control poboacional de gaivota patiamarela, do estornino pinto e da pomba doméstica. Unha campaña que se inicia dende xa coa posta a disposición dos ferroláns do teléfono 981.94.41.60 e que precisa de xeito fundamental da implicación directa da cidadanía para o seu éxito, polo que o edil de área, Rafael Fernández Beceiro, aproveitou a oportunidade para facer un chamamento neste senso e animar a toda a veciñanza a alertar telefonicamente da existencia dos nidos.

Un equipo multidisciplinar da empresa Locus Avis levará a cabo o plan estratéxico, no que a supervisión correrá a cargo dun biólogo e a execución, de ornitólogos. As accións son moi concretas: elaboración dun censo poboacional; creación dun servizo de atención cidadá e un control de nidificación. Nesta liña, apuntou que a campaña do 2009 se pechou coa revisión duns 880 tellados e unhas 288 solicitudes veciñais reclamando este servizo.

O goberno local xustificou a necesidade de activar a campaña, gratuíta para os cidadáns, nos problemas e molestias que lle acarrea á poboación de Ferrol a presencia destas tres aves, así como pola súa irrupción en lugares ata o dagora vetados como era o entorno urbano. Explica que esas molestias veñen xeradas polo excesivo ruído das aves no periodo reproductor; en malos olores; no deterioro nos materiais de construcción sobre os que se instalan, ou na perda de imaxe para a cidade, na que edificios de importante valor histórico-artístico e patrimonial son ocupados especialmente por gaivotas.

Detectados os problemas, o goberno local apunta que os obxectivos marcados están claros: minimizar as molestias; atender aos cidadáns que realicen denuncias á concellería que dirixe, dándolles a solución máis adecuada en cada momento, e informar con rigor á opinión pública dos traballos que se estean a realizar en cada momento ao abeiro do dito plan.

Para conseguilos, o responsable de Medio Ambiente do Concello de Ferrol desgranou polo miúdo as accións específicas incluídas no proxecto. En primeiro lugar, elaboraráse un censo poboacional durante a época actual de cría. Localizaránse os lugares de nidificación no casco urbano, mediante o conteo directo de individuos dende puntos elevados da cidade. E, á información obtida, se lle sumará a recabada mediante as denuncias cidadás realizadas á concellería. Para facer efectiva a participación dos veciños e veciñas de Ferrol, Rafael Fernández Beceiro anunciou que se habilita, dende hoxe mesmo, un número de teléfono para este fin: 981.944.160 (en horario de 9 a 14 horas).

Unha vez recibidas as denuncias cidadás, os técnicos encargados do control poboacional se porán en contacto cos afectados para informarlles das posibles solucións ao problema e se concertará o antes posible unha visita ao inmoble. Nos casos máis comúns de molestias causadas por gaivotas, os técnicos en manexo de fauna desenvolverán nos domicilios as labores que permitan pór fin ou minimizar a causa que as produce. Especialmente, localizar os nidos e retiralos.

Por último e durante o control da nidificación, que temporalmente se desenvolve entre maio e agosto, os técnicos acudirán aos tellados onde se reciban denuncias da presenza de aves, así como a aqueles outros que non sendo denunciados vía municipal se constate ou sospeite tal extremo. Así as cousas, coa información da localización de edificios se pasará á acción concreta.

Para concluír, o concelleiro reclamou a colaboración cidadá para levar a cabo a campaña de xeito satisfactorio e destacou a problemática que pode causar a superpoboación de gaivotas na cidade naval: suciedade, tellados en mal estado e mesmo riscos sociosanitarios. Problemática que se pode atallar coa adopción de medidas como a retirada dos niños, dos ovos ou das crías presentes neles.

ferrol.es

ESTUDO DA DECLARACIÓN DO BARRIO DO INFERNIÑO.

A Xunta directiva desta Asociación veciñal O Rosario- Inferniño, presentou no REXISTRO MUNICIPAL un escrito dirixido ao Sr. Alcalde para o inicio dun estudo ou informe co fin de realizar unha DECLARACIÓN formal do BARRIO DO INFERNIÑO.

Requerimos unha actitude seria e rigorosa no estudio dun informe que recoñeza esta situación ao marxe de que se poida compartir espazos comprendidos de Participación Cidadá, Asembleas de Barrio ou programas culturais para esta zona.

Esperamos que non se faga un INFORME de ASOCIACIÓNS VECIÑAIS, senon confirmar unha realidade social deste barrio do Inferniño na Parroquia do Rosario.

Existe, de facto, esta realidade recoñecida por parte da veciñanza da zona do Inferniño que comprende desde Avda. da Paz até Rúa Manuel Belando, onde convive realidades propias da parroquia do Rosario, cunha poboación ampla, numerosa e consolidada dende hai 50 anos.

O Concelleiro de Participación Cidadá está informado para iniciar os trámites oportunos o cal confiamos o inicio este expediente o cal realizaremos as aportacións necesarias e o seu seguimento.

Contimuaremos reclamando esta reivindicación por que entendemos que non se pode obviar esta realidade social do Inferniño.

---------------------------------------------------------

DECLARACIÓN DO INFERNIÑO COMO BARRIO.

A Xunta directiva desta Asociación Veciñal O Rosario- Inferniño, solicitamos ao Concello de Ferrol o inicio informe para unha futura DECLARACIÓN desta parroquia do Rosario como BARRIO do INFERNIÑO.

Analizadas as distintas singularidades e antecedentes desta zona, afirmamos que esta parroquia do Rosario ten a suficiente ENTIDADE e IDENTIDADE para ser recoñecido como BARRIO do INFERNIÑO.

Como todos sabemos a partir da segunda metade do século XX, a cidade de Ferrol foi crecendo fora de Porta Nova, actual Praza de España, xurdindo o que agora se coñece como Ensanche A, onde a veciñanza se foi organizando co nacemento de dúas PARROQUIAS; SAN PEDRO e O ROSARIO.

Sabemos polos historiadores que a Parroquia foi implantada dende a chegada dos Suevos a Galiza como unha unidade territorial de marcada importancia e gran tradición.

Lembramos que a Confederación Galega de Asociación Veciñais de Galicia (COGAVE), aprobou unha resolución na súa Asemblea Xeral celebrada en Pontevedra no 2003, onde recoñecía a relación de Parroquia e Barrio sen caer en ningunha connotación relixiosa.


Nosa pretensión consiste en que O Inferniño debe ter a consideración de Barrio co fin de elixir, decidir ou reivindicar o seu futuro nas relacións sociais e culturais, dende a perspectiva da solidariedade co máis absoluto respecto da legalidade.

SOLICITAMOS ;

Que en base a todos estes argumentos o Goberno Municipal realice todos os estudos necesarios para realizar unha DECLARACIÓN FORMAL DA PARROQUIA DO ROSARIO COMO BARRIO D´O INFERNIÑO.





Ferrol, a 12 de Abril de 2010.


A Presidenta O Secretario



Asdo. Ana J. LÓPEZ DÍAZ asdo. Xosé M. SANXOÁN CAAMAÑO




- ALCALDE- PRESIDENTE CONCELLO DE FERROL.-

COMUNICADOS FEIRÓN INFERNIÑO.

NOTA DE PRENSA

Asociación Veciñal O Rosario.-Inferniño, informamos que no ultimo Feirón do Inferniño do pasado sábado, estivemos repartindo un COMUNICADO, explicando a nosa satisfacción motivada ao RESCATE da XESTIÓN e COBRAMENTO deste Feirón por parte do Goberno Municipal.

Denunciamos que durante o transcurso do Feirón, que certos rumorosos estaban especulando aos feirantes e comerciantes sobre a posibilidade de que a nosa Asociación ía facerse cargo deste Feirón e cobramento das taxas, incluso que iamos incrementalas.

Esta Asociación do BARRIO do INFERNIÑO, DESMINTE tales infamias e calumnias polo que NEGA e REXEITA estas especulacións mal- intencionadas.

Debemos lembrar que estas competencias corresponden única e exclusivamente ao Concello de Ferrol por ser competencia municipal.

Debemos manifestar que a nosa asociación non se lle ocorre realizar un cobramento destas taxas ou merced pola realización dunha actividade comercial nun ESPAZO DE DOMINIO PÚBLICO. Debemos entender que as Asociacións veciñais son entidades sen ánimo de lucro, que colaboran e axudan a desenvolver un barrio, pero nunca deben extralimitarse nas súas funcións ou usurpar as competencias municipais.

Incidimos que non forma parte de noso ideario nin é noso estilo ir cobrando polos postos dos feirantes e comerciantes, enviando esta mensaxe de tranquilidade aos nosos/as socios/as e veciñanza deste BARRIO DO INFERNIÑO de que xamais caeremos en semellantes baixezas.

Para rematar, queremos denunciar que neste último feirón non se respectaron os acordos alcanzados cos Concelleir@s responsables e incumprimentos da Ordenanza Municipal deste Feirón.

Ferrol. a 13 de Abril de 2010.

- - - - - - - - - - - - - - - - - - - - - - - - - - - - - - - - - - - - - - - - - -

C O M U N I C A D O

- A Asociación Veciñal O Rosario- inferniño, expresamos nosa satisfacción pola decisión do Goberno Municipal en RESCATAR a XESTIÓN e COBRAMENTO das TAXAS deste FEIRÓN DO INFERNIÑO a partir do vindeiro mes de Maio.

- Levamos máis de 4 anos reivindicando a mala – nula xestión do Feirón por parte da A.VV. Ensanche A, permitindo de forma permanente a ocupación das beirarrúas e accesos a Praza do Inferniño por máis de 50 -60 vehículos.

- Denunciamos que unha entidade sen animo de lucro como a A.VV. Ensanche A, realice o COBRAMENTO das TAXAS municipais aos feirantes o que consideramos nunha actividade comercial nun Espazo de DOMINIO PÚBLICO.

- Esta Asociación Veciñal O Rosario- Inferniño, ten o compromiso do Goberno Local de manter unha patrulla de Policía municipal permanente e a posta en marcha nun futuro inmediato da TARXETA IDENTIFICATIVA dos postos, indicando o tipo de venda, mercadoría, foto propietario e sinatura concellaría municipal.
De non contar con as garantías sanitarias e seguridade, pediremos a disolución deste Feirón.

- Continuaremos reivindicando o cumprimento da Ordenanza Municipal Mercados, co fin de preservar todas as garantías de calidade, sanitarias e unha óptima xestión ao servizo dos usuarios/as.


Ferrol , a 10 de Abril de 2010.


- A XUNTA DIRECTIVA .-

MANIFESTACIÓN EN DEFENSA DA SANIDADE PÚBLICA.-

Ferrol Luns 12 de Abril de 2010

Miles de persoas maniféstanse contra

a privatización do sistema sanitario.

Os asistentes á manifestación, ao seu paso pola Rúa María.

REDACCIÓN > FERROL

Unhas dez mil persoas segundo a organización e cinco mil segundo a Policía Local de Ferrol, secundaron onte a manifestación convocada pola Plataforma pola Defensa da Sanidade Pública, en contra da privatización sanitaria.

Pasadas as doce do mediodía o colectivo partiu da praza de España cara a Rúa María para chegar a Amboage e incorporarse á rúa Real, finalizando o percorrido na praza de Armas, unha hora e media despois.

Foi neste último punto onde o portavoz da plataforma en Ferrol, Miguel López, leu o manifesto redactado para a ocasión.

Un total de 43 entidades, entre elas, asociacións culturais, veciñais, sociosanitarias, partidos políticos, sindicatos e Xunta de Persoal da área Sanitaria de Ferrol, apoian á Plataforma ferrolá.

Á convocatoria asistiron varios rexedores locais, entre eles, os de Ferrol, Fene e Ares (PSOE) e Mugardos (BNG).

O texto aludiu inicialmente á redución de orzamentos en materia sanitaria e tamén á falla de compromiso coa Área Sanitaria de Ferrol por parte da Consellería de Sanidade.

Agradecendo a asistencia a cantos secundaron a convocatoria da Plataforma, López incidiu en que a sanidade pública é unha conquista da cidadanía, non foi un agasallo de ninguén, con defectos que hai que corrixir, como as listas de espera. Mostrando a súa oposición a que a Xunta "converta a saúde nun negocio que beneficie a empresas construtoras e aseguradoras, bancos, e mesmo a farmacéuticas", o colectivo reclamou o seu dereito á protección da saúde, recollido na Constitución.

A Plataforma alerta de que o modelo que se pretende trasladar a Galicia xa fracasou noutros puntos da comunidade española, como Madrid e Valencia, e en países como Reino Unido.

En España implantouse nunha época de bonanza económica, o que vén demostrar, segundo a Plataforma, "que é unha medida absolutamente política de aposta por un modelo fracasado e que non ten absolutamente nada que ver coa crise económica".

A Plataforma en Defensa da Sanidade Pública de Ferrol acusa a Núñez Feijóo de "non aprender dos seus erros" e incide na necesidade de apostar por establecer un modelo "cada vez máis público, máis universal, e que dea cobertura a máis persoas".

En Galicia, afirma o colectivo "estase indo xusto non sentido contrario, e vaise cara a privatización de servizos, a precarización e a redución do emprego, como xa sucede en Madrid".

Así mesmo, no manifesto laméntase a redución, por parte da Xunta, de 36 millóns de euros no orzamento da Consellería de Sanidade, "o que vai impedir que se poidan ofertar novos servizos, mellorar os existentes e incrementar os cadros de persoal".

No que respecta ao Área Sanitaria de Ferrol, a Plataforma apunta á desaparición de case unha trintena de prazas de médicos, pediatras, enfermeiros e fisioterapeutas que xa estaban orzadas no 2009 para a zona. Ademais, preguntan polas 458 prazas de Primaria anunciadas en Galicia e denuncian o incremento de acordos con hospitais e clínicas privadas, citando como exemplo o caso do hospital Povisa, en Vigo, que recibe 72 millóns de euros anuais.

A falta de aplicación do decreto de incompatibilidades -cuxas consecuencias en Ferrol consideran "escandalosas"-, a parálise de proxectos que se ían a acometer tras a incorporación ao Sergas do Hospital Naval, a falta de investimentos en Alta Tecnoloxía para Ferrol este ano e as cada vez maiores listas de espera son outras das críticas formuladas pola Plataforma en Defensa pola Sanidade Pública.

O colectivo demandou un centro de referencia de enfermidades profesionais na comarca, un aumento do orzamento de Sanidade e maior control do gasto farmacéutico.

Ademais, acusou á Xunta de "querer converter a saúde nun negocio" e fixo un chamamento á sociedade para secundar as mobilizacións que, en diante, convóquense para evitar a privatización da sanidade.

Diario de Ferrol.-

FUTURO PARQUE URBANO.-

O Palco dás Ánimas converterase

no maior pulmón verde do Ensanche.

O novo parque sufragarase con 680.000 euros do Plan E

e incluirá a plantación dun centenar de árbores.

Autor:
Rocío Pita Parada

Un investimento de máis de 680.000 euros transformará o Palco de Ánimas no novo pulmón do centro urbano de Ferrol e na zona verde máis ampla do Ensanche A.

A ambiciosa actuación exposta polo Concello de Ferrol pretende acabar coa deterioración e abandono da zona que circunda o pavillón polideportivo e que se estende desde a rúa Río Xubia ata as vías do ferrocarril.

E farao cunha reforma integral que inclúe a plantación dun centenar de árbores, a urbanización da contorna e a explanación de novas superficies de estancia, paseo e aparcadoiro.

A actuación sufragarase con fondos do Plan E e por iso, prográmase a actuación para este ano.

De feito, o proxecto está xa redactado e o proceso administrativo para a contratación está xa en marcha.
O proxecto executarase sobre unha superficie de 15.395 metros cadrados que supón o 90% dos terreos incluídos no plan xeral de ordenación municipal dentro do ámbito de actuación Palco das Ánimas. Segundo explicou o concelleiro de Urbanismo, Ángel Mato, a parte restante quedará para unha segunda fase. «Actuarase naquela superficie na que temos dispoñibles os terreos», sinalou.
A actuación tamén servirá para aplicar un cambio radical no urbanismo das rúas que delimitan esta contorna. Segundo o plan, a rúa Río Xubia, no tramo comprendido entre as rúas Illas Gabeiras e Seselle, converterase nunha avenida arboredo que trazará o frontal do parque. E a rúa Inferniño, nun bulevar.

Na mazá máis próxima ao pavillón, de escasas presenza comercial, esta vía conta con once vados permanentes de acceso a garaxes. «Desaparecerá o aparcadoiro desta rúa e xerarase unha zona verde moi importante», describe Mato.

A circulación rodada neste tramo limitarase ás entradas aos garaxes e aos transportes de urxencias.

Para evitar a diminución de estacionamento nunha actuación que, seguindo os criterios do Plan de Mobilidad, primará ao peón sobre os vehículos, habilitará un novo estacionamento, con firme de celosía de formigón e céspede, no propio parque e integrado visualmente cun muro perimetral vexetal.
A superficie será apta, ademais, para acoller actividades deportivas exteriores.

Ademais, proxéctase continuar a rúa río Sil, actualmente interrompida.

Unha senda peonil rodeará a parte traseira do pavillón e escaleiras e ramplas salvarán os numerosos desniveis da zona

-----------------------------------------------------------------------------------


Unha gran superficie só apta

para mascotas e cascallos

A degradación actual do espazo

O Palco de Ánimas de hoxe é moi distinto do que se deseña sobre o papel e que debería ser unha realidade a principios do próximo ano.

A superficie do futuro parque resúmese nun espazo amplo e abandonado, onde a herba crece por aquelas zonas nas que o barro non lle gañou o espazo. As árbores brillan pola súa ausencia.

E o mobiliario urbano. Nin un triste banco nin unha papeleira. Nada que poida contribuír a facer máis confortable un espazo inhóspito que só gozan os cans que, acompañados polos seus amos, saen a diario a pasear... e a depositar os seus excrementos.

A maleza recubre o exterior do pavillón.

A súa sucidade e degradación invita a converter a zona nun vertedoiro ilegal, onde ocasionalmente se depositan cascallos de obra.

Os plans de reforma inclúen a recuperación da superficie parcialmente alagada na que crece vexetación de humidal.

Poucas persoas acoden xa a este lugar. Nin rastro da concorrencia que cada fin de semana utilizaban aquela atalaia cuxo elevación permitía que moitos racinguistas seguisen gratuitamente cada fin de semana as evolucións do equipo da cidade no campo do Inferniño, unhas almas ás que a zona debe a súa bautizo como Palco dás Ánimas.

Os vehículos sortean fochancas e fochas nas rúas lindeiras a un pavillón polideportivo utilizado por escolas deportivas e clubs, cuxa afluencia por picos impulsa aos condutores a botarlle imaxinación e a desafiar ás multas á hora de aparcar.

--------------------------------------------------------



A actuación poderíase desenvolver

en medio ano.

O novo parque podería ser unha realidade este mesmo ano.

O prazo de execución estimado inicialmente é duns oito meses, aínda que o proxecto de reforma inclúe un cronograma de traballos que podería rebaixar ese tempo ata o medio ano.

Dependerá das melloras achegadas polas empresas que concorran, e que teñen de prazo ata hoxe para presentar as súas ofertas por rexistro.

Mato explicou que o proxecto se deseñou tras un estudo de seguimento do plan xeral, do 2008, no que concluía que existía un déficit de xeración de espazos libres e dotacionais na cidade, e especialmente nos ensanches.

A actuación proposta suplirá esa carencia cun espazo cheo de vexetación, que incluirá nove bancos e nove papeleiras.

La Voz de Galicia.-

RESCATE DA XESTION - FEIRÓN INFERNIÑO.-

O feirón mensual do Inferniño pasará

a ser de xestión municipal a partir de maio

O Concello de Ferrol farase cargo a partir do mes de maio da xestión do feirón mensual do Inferniño, do que ata agora se ocupa a asociación de veciños do Ensanche A.

Este labor foi duramente criticada en distintas ocasións pola asociación veciñal do Rosario-Inferniño, que reclamaba que a xestión fose municipal e denunciou incumprimentos da ordenanza que rexe a venda ambulante en Ferrol.

Desta forma, segundo o Concello «regularízase» un mercadillo que naceu hai once anos por iniciativa da entidade veciñal do Ensanche A e a petición dun grupo de vendedores ambulantes para revitalizar a actividade económica e social no barrio.

O goberno municipal ten previsto aplicar unha nova redistribución dos postos existentes, de maneira que entorpezan o menos posible o tráfico e o estacionamento. Así mesmo, elaborouse un novo censo co que incorporarán uns 40 postos aos 130 xa existentes.

La Voz de Galicia.-

- - - - - - - - - - - - - - - - - - - - - - - - - - - - - - - - - - - - - - - - -

Mércores 31 de Marzo de 2010

O Concello asumirá a xestión do

feirón do Inferniño desde o mes de maio

redacción >ferrol

Os concelleiros de Facenda, Ramón Veloso, e Mercados, Rafael Fernández, informaron onte de que a partir do mes de maio o Concello asumirá a xestión do feirón do Inferniño, que se celebra cada segundo sábado de mes.

Deste xeito, coa colaboración da entidade veciñal regularízase a xestión deste mercadillo, que naceu fai once anos pola iniciativa da AVV Ensanche A e dos vendedores ambulantes como vía para revitalizar a zona.

Agora, como explicou Rafael Fernández, faise necesario actualizar a situación e, coa axuda da entidade, distribuiranse en abril circulares para informar dos cambios. Así, o goberno levará a cabo unha redistribución dos postos existentes, intentando diminuír o impacto destes no tráfico e a mobilidade da zona.

Así mesmo, xa se elaborou un novo censo e a día de hoxe iniciarán esta nova andaina uns 40 postos dos máis de 130 que operaban ata agora.

O Concello tamén asumirá o cobro das taxas.

Diario de Ferrol.-

ESTUDOS NATALIDADE NA AREA DE FERROL

Ferrol Domingo 21 de Marzo de 2010

As persoas de 32 anos son o colectivo

máis numeroso na cidade

A natalidade descendeu á metade desde os anos 70

Jorge meis reportaxe de P.R.C.

Se vostede ten 32 anos de idade ha de saber que pertence ao colectivo de persoas máis numeroso de Ferrol, con 1.170 cidadáns.

O grupo de idade máis abundante na cidade naval é, segundo os datos do Instituto Galego de Estatística, o comprendido entre os 16 e os 64 anos, é dicir, o de poboación adulta (48.514 persoas).

Neste mesmo grupo se incriben o segundo e o terceiro posto (os que agora teñen 36 anos e os que teñen 34), o que pon de manifesto que o "baby-boom" ferrolán situouse na segunda metade da década dos 70.

Que naquela época nacesen algo máis de 1.100 nenos demostra que o actual índice de natalidade está moi lonxe de alcanzar esas cotas. En Ferrol hai 472 nenos que aínda non cumpriron un ano de idade e no grupo entre 0 e 15 o total é de 8.632, pouco máis de 500 por ano.

A taxa reduciuse, pois, nestas tres décadas, practicamente á metade. Entre os que aínda son menores de idade, os "mellores anos" no que a natalidade se refire foron 1993 -houbo 625 nacementos-, 2008 -con 594- e 2005 -con 583-.

Por tramos de idade só superan o milleiro de veciños quen teñen entre 29 e 30 anos, de 37 a 39, 41, de 43 a 44, de 46 a 48, de 51 a 55, 57 e de 60 a 64 anos.

No resto de grupos, as cifras non chegan ao milleiro.

O colectivo menos numeroso é o de 65 anos e máis, con 17.217 persoas entre as que son abafadora maioría as mulleres: 10.439 por 6.688 homes.

Cantos centenarios hai en Ferrol? Pois nin máis nin menos que 25, dos que case a metade (11) acaban de alcanzar esta idade. Pero entre quen pasaron o século de vida apenas hai homes, en concreto na cidade residen tres, dúas de cen anos e un de 101.

As máis lonxevas son dúas mulleres de 106 e 104 anos.

Pero os datos que ten rexistrados o Centro de Recursos Informáticos (CRI) ferrolán ofrecen tamén outras cuestións curiosas. Entre elas está que, a pesar de que se adoita dar por sentado que hai máis mulleres que homes, hai tramos de idade en Ferrol nos que sucede o contrario.

Efectivamente as mulleres son maioría no cómputo global (39.397 fronte a 34.876 homes), pero entre os cero e os seis anos son maioría os homes, que tamén predominan nos tramos de idade entre oito e doce anos, de 16 a 21, os de 24 e 25, de 27 a 29, de 31 a 33, 35 e 36, 39 e 40 e 43.

A partir desta idade, a tendencia invístese e xa son maioría as mulleres.

Diario de Ferrol.-

DECLARACIÓN DE BARRIO DO INFERNIÑO.-

DECLARACIÓN DO INFERNIÑO COMO BARRIO.

A Xunta directiva desta Asociación Veciñal O Rosario- Inferniño, comunicamos que imos solicitar ao Concello de Ferrol a DECLARACIÓN desta parroquia do Rosario como BARRIO do INFERNIÑO.

Analizadas as distintas singularidades e antecedentes desta zona, afirmamos que esta parroquia do Rosario ten a suficiente ENTIDADE E IDENTIDADE para ser recoñecido como BARRIO do INFERNIÑO.

Como todos sabemos a partir da segunda metade do século XX, a cidade de Ferrol foi crecendo fora de Porta Nova, actual Praza de España, xurdindo o que agora se coñece como Ensanche A, onde a veciñanza se foi organizando co nacemento de dúas PARROQUIAS; SAN PEDRO e O ROSARIO.

Sabemos polos historiadores que a Parroquia foi implantada dende a chegada dos Suevos a Galiza como unha unidade territorial de marcada importancia e gran tradición.

Lembramos que a Confederación Galega de Asociación Veciñais de Galicia (COGAVE), aprobou unha resolución na súa Asemblea Xeral celebrada en Pontevedra, onde recoñecía a relación de Parroquia e Barrio sen caer en ningunha connotación relixiosa.

Nosa pretensión consiste en que O Inferniño debe ter a consideración de Barrio co fin de elixir, decidir ou reivindicar o seu futuro nas relacións sociais e culturais, dende a perspectiva da solidariedade co máis absoluto respecto da legalidade.

Proporemos este debate con campañas informativas e reunións coa cidadanía, entidades sociais, responsables municipais para rematar cunha SOLICITUDE FORMAL DE DECLARACIÓN DO INFERNIÑO COMO BARRIO.

Facemos un chamamento a toda a veciñanza co animo de recibir todo o APOIO para conquerir esta conquista para O INFERNIÑO.

Ferrol, a 4 de Marzo de 2010.

A Directiva.-

- - - - - - - - - - - - - - - - - - - - - - - - - - - - - - - - - - - - - - - - - - - -

A asociación do Rosario pide que se

denomine á parroquia barrio do Inferniño

A asociación veciñal do Rosario-Inferniño emprendeu unha campaña informativa para conseguir para a parroquia a denominación de barrio do Inferniño.

A entidade rexeita que se considere Ensanche A tanto á zona da parroquia de San Pedro como a do Rosario pola inconcreción e «confusión» que xera, segundo indicou onte un dos membros da entidade promotora.

Argumentan que un encontro, celebrado hai anos, da Confederación Galega de Asociacións Veciñais de Galicia recoñecía a equiparación de parroquia con barrio sen caer en connotacións relixiosas.
Por iso, reclaman o recoñecemento ao considerar que O Rosario «ten a suficiente entidade e identidade», sen que supoña «ningunha intención de separatismo», sinalou o secretario, Xosé Mel Sanxoán.
A asociación elaborará material informativo e auspiciará reunións coa cidadanía e os responsables municipais conducentes á solicitude formal dunha declaración oficial.

La Voz de Galicia.-

FOTOS VISITA EXPOSICIÓN ALUMNOS/AS CEIP RECIMIL

Visita dos Alumnos/as de 6º CEIP RECIMIL a esta exposición de pintura as Mulleres e a Ciencia no Centro Cultural Municipal Carvalho Calero.

Exposición de Margarita Cimadevila, profesora e directora do colexio Urbano Lugrís.

Exposición aberta do 1 de marzo ate o 15 de Marzo-10.

Fotos da visita dos alumnos/as de 6º CEIP RECIMIL, Centro Cultural Carvalho Calero este día 9 marzo-2010.

SOLICITUDE DA VOGALÍA MULLER - CONSELLO DA MULLER.

SOLICITUDE ENTRADA

CONSELLO SECTORIAL MULLER

A Asociación Veciñal O Rosario- Inferniño, ten dende hai un ano unha Vogalía de Muller co fin de reivindicar o papel fundamental que está a desenvolver a muller en todos os ámbitos socias, laborais e culturais.

Coincidindo coa celebración do DIA DA MULLER TRABALLORA, notificamos neste día a decisión desta xunta directiva co fin de que estas reivindicacións sexan realizadas todos os días do ano.

Esta Asociación Veciñal e esta Vogalía de Muller, queremos COLABORAR co fin de conseguir maiores cotas de recoñecemento e xustiza social.

SOLICITAMOS:

Que se aprobe a entrada neste CONSELLO SECTORIAL DE MULLER, aos membros directivos e vogalía de Muller desta Asociación Veciñal:

Mercedes SALVATIERRA VENTURA ; Ana Jesús LÓPEZ DÍAZ.

Ferrol, a 8 de Marzo de 2010.

A Presidenta / O Secretario

Asdo. Ana J. LÓPEZ DÍAZ / asdo. Xosé M. Sanxoán Caamaño

EXPOSICIÓN CIENCIA EX-AEQUO

- EXPOSICIÓN CIENCIA Ex- Aequo -

Esta Asociación Veciñal do Inferniño, dende a nosa VOGALÍA DE MULLER, queremos render a nosa homenaxe as mulleres que foron descriminadas socialmente por esta condición.

A Concelleira de Educación, Mercedes Carbajales, abreu esta Exposición.

A Asociación Veciñal O Rosario- Inferniño en mutua colaboración coa area de Educación do Concello de Ferrol, abriron a exposición de pintura Ciencia Ex- Aequo da autora MARGARITA CIMADEVILA.

Participaron os alumnos/as do IES SOFÍA CASANOVA polo que agradecemoslles o seu interese asi como a colaboración do corpo de profesores/as.

Estará aberta esta EXPOSICIÓNS no Centro Cultural Carvalho Calero do 1 ao 15 de Marzo.

Nesta Exposición se visualizará a relación que hai entre estas obras e os descubrimentos destas científicas de principios do século XX, discriminadas por súa condición de muller

As visitas a sala de Exposicións se sucederán por parte de estudantes de distintos centros escolares e institutos.

A comisaria de Exposición, Ana Jesús López, estará a disposición para realizar visitas guiadas e explicacións.

Solicita-lo ao correo da Asociación.

Cuadros de grande calidade artística e de contido científico.

avvorosario@gmail.com