FESUCO denunciada pola CIG

A CIG denuncia o despedimento dos

empregados de limpeza de Porta Nova .

 Martes, 17 de Xullo de 2012

c.r.c. ferrol.
A situación do centro comercial Porta Nova non mellorou desde hai quince días, cando os propietarios de establecementos comerciais do inmoble de propiedade municipal denunciaron a falta de limpeza das instalacións, tanto nos corredores como nos baños. As papeleiras cheas e desbordadas e o mal estado dos aseos, que levou ao seu peche ao público, paliáronse en parte polo labor dos comerciantes.

 Un deles procedeu particularmente a contratar a unha empresa para limpar a contorna do local.

 O Concello non tomou ningunha medida práctica dende entón, aínda que si levou a cabo un informe policial para redactar un expediente e, como anunciou o edil de Economía, Alejandro Langtry, exponse unha reunión cos comerciantes.  Entre tanto, a situación agrávase desde o punto de vista laboral, xa que, como denunciou onte a CIG,  despediuse a dous traballadores da empresa que se encargaba da limpeza -Ssigatty- e que estaba contratada pola que xestiona o centro comercial, Fesuco.

Onte concentráronse na contorna de Porta Nova os delegados da CIG en protesta por estes despedimentos, sinalando a Fesuco e ao Concello como os responsables desta situación.

Deste xeito, desde o sindicato denúncianse os incumprimentos da concesionaria da xestión do centro comercial "que debe uns 500.000 euros ao Concello" pero tamén a "pasividade e permisividade" do Concello, así como a falta de control e de eficacia para solucionar o problema.

A CIG informa de que Fesuco rescindiu o pasado 30 de xuño os contratos coa empresa de seguridade privada e de limpeza do centro comercial Porta Nova.

Así mesmo, asegura que a primeira, a pesar de levar cinco meses sen cobrar de Fesuco, continúa prestanto o servizo de seguridade pero a empresa de limpeza deixou de realizala, enviando aos seus traballadores primeiro de vacacións e posteriormente despedíndoos. A CIG denuncia, así mesmo que "casualmente SSigatty é unha empresa relacionada coa xerencia do centro comercial", é dicir, con Fesuco.

Desde CIG-Servizos pídese a readmisión inmediata dos traballadores así como que o Concello ferrolán proceda xa ao rescate da xestión do centro comercial así como á normalización do funcionamento das instalacións.

Diario de Ferrol.-

 

Informe ao Consello Consultivo.

O pleno municipal aproba solicitar

ao Consello Consultivo de Galicia

que se sitúe sobre a extinción do

contrato de Porta Nova.

Todos os grupos políticos apoiaron a iniciativa

Ana de Antonio

Ferrol 17 de xullo de 2012               

O pleno de Ferrol acaba de aprobar solicitar ao Consello Consultivo de Galicia que se pronuncie acerca do expediente iniciado polo goberno municipal para a extinción do contrato de concesión para a explotación do centro comercial Portanova, situado no Inferniño.

Todos os grupos políticos con representación municipal votaron a favor desta proposta impulsada pola área de Economía. O concelleiro responsable, Alejandro Langtry, explicou que a entidade concesionaria do centro comercial Ferrolterra Superficies Comerciais entrou en suspensión de pagamentos, o que é ''motivo suficiente para recuperar a concesión, tal e como se recolle non prego de condicións''.

Neste sentido, o Concello mantivo varios encontros coa firma concesionaria que inicialmente estaba disposta a renunciar ao contrato administrativo, pero a súa posición ''mudou e agora oponse ao rescate de mutuo acordo''.

 Ante este cambio, ''o seguinte paso da administración ferrolá que esta mañá refrendou ou pleno é pedir ao Consello Consultivo de Galicia que emita un informe para proceder ao rescate difinitivo da concesión'', indican desde o Concello.

La Voz de Galicia.-

I Semana sen limpeza - Auditoría a FESUCO

Unha semana sen limpeza no

centro comercial Porta Nova .

 Martes, 10 de Xullo de 2012.

 lorena romeu
 Ferrol.
O centro comercial Porta Nova permanece desde hai xa unha semana sen servizo de limpeza. Unha patrulla da Policía Local acudiu onte as instalacións para redactar un informe que permitirá ao Consistorio tomar cartas no asunto. Á espera de que isto suceda, os comerciantes continúan impotentes tras comprobar que a empresa concesionaria da xestión das instalacións, Fesuco, continúa facendo caso omiso ás esixencias do goberno local.

O concelleiro de Economía, Alejandro Langtry, advertiu a pasada semana do secuestro da concesión no caso de que o servizo de limpeza non se restablecese en 24 horas.

O prazo expirou o venres pero a compañía non retomou os traballos.

Algúns comerciantes que operan no centro comercial Porta Nova afanábanse onte na limpeza das zonas máis próximas aos seus locais, mentres as papeleiras e os corredores continúan acumulando lixo e nos baños -moi utilizados mesmo polas persoas que frecuentan un parque próximo- pódese ver un cartel no que se piden desculpas pola falta de limpeza.

O edil de Economía, Alejandro Langtry, explicou onte que se están "solicitando informes" sobre a situación. Sobre a posibilidade de que sexa o propio Concello o que restableza o servizo "aínda facturándolle posteriormente á concesionaria" ante a falta de hixiene e os problemas de salubridade, o concelleiro sinalou que "só pode prestar o servizo o adxudicatario".

A empresa Fesuco remitiu a pasada semana un escrito ao Consistorio no que indicaba, segundo apuntou Langtry, que "estaban a limpar". Unha afirmación que contrasta totalmente co aspecto que, desde hai unha semana, presenta o interior do centro.

malestar.-

A directiva da Aso.Veciñal O Rosario do Inferniño mostrou onte o seu malestar ante "a falta de limpeza e o lamentable estado de abandono no que se encontra este centro por decisión da empresa concesionaria, Fesuco". O colectivo solidarízase cos empresarios e solicita unha investigación da empresa de limpeza, Ssigatty.
A entidade pide ademais unha auditoría para saber a que se destinou o diñeiro das cotas que cada mes abonaron os comerciantes que operan en Porta Nova

Diario de Ferrol..-

FESUCO non responde.

Expira o prazo do Concello sen que

se restableza a limpeza en Porta Nova.

 Sábado, 07 de Xullo de 2012

  A empresa Fesuco fixo caso omiso ás advertencias do goberno local de secuestrar a concesión da xestión do centro comercial Porta Nova no caso de que onte non se restablecese o servizo de limpeza nas instalacións.

 O prazo concedido polo goberno local expirou onte pero non causou o efecto desexado. Os comerciantes denunciaban onte que o lixo continúa acumulándose nos corredores do centro e advertían de problemas de insalubridad nos baños "non hai quen entre", aseguraba un empresario- tras cinco días consecutivos sen servizo de limpeza.
A firma Fesuco rescindiu por burofax os contratos ás compañías encargadas do mantemento e limpeza e a vixilancia desde o pasado 1 de xullo.

Pese ao ultimato efectuado desde o goberno local o pasado mércores, o equipo de Rei Varela declinou onte a posibilidade de pronunciarse sobre a situación e as posibles consecuencias de non atender a concesionaria ás súas esixencias, tras anunciar que se procedería a secuestrar a concesión de Porta Nova.

Postos en contacto co Consistorio, aos empresarios indicóuselles -segundo apuntaron desde o colectivo- que se ía a acudir onte nas instalacións unha patrulla da Policía Local. A media tarde, aseguraban desde o sector que "por aquí non se pasou ninguén".

Diario de Ferrol.-

I INFERNIÑO FOLK

I INFERNIÑO FOLK

Actuación de ESPERABAS QUE VIÑERAS de Mugardos no Centro Cultural Carvalho Calero este Venres-6 de Xullo.

Fotos I Inferniño Folk

I  INFERNIÑO FOLK

Actuación de ALÉN DE ANCOS este venres-6 no Centro Cultural Carvalho Calero.

I INFERNIÑO-FOLK - Cartel

A Asociación veciñal O Rosario-Inferniño  e a Asociación Cultural Terra Meiga, organizamos un FESTIVAL FOLK para o vindeiro VENRES , día 6 a partir das 8 h da tarde no Palco da Música da Praza do Inferniño.

Neste  Festival I INFERNIÑOFOLK, contaremos cos Grupos de música folk ALÉN DE ANCOS  e ESPERABA DE VIÑERAS , coa colaboración da Deputación provincial d´A Coruña , dentro da programación de cultura e o concello de Ferrol.

 Informacións artísticas:

Alén de Ancos é un grupo de Ferrol en constante actualización desde o seu nacemento no 2007. Despois de diversas probas musicais, o estilo defínese como FolkFusión dada a mestura de cancións tradicionais con outras de composición propia.

Levando as rendas da sonoridade musical temos whistles e uilleann pipe, sempre apoiados nos acordes de guitarra e piano, e seguindo os ritmos de bodhran e caixón.

Esta nova agrupación naceu coma un 'hobby' para un grupo de amigos que se coñeceran no seo de diferentes entidades e bandas da comarca. Pouco a pouco, e tras moitas horas de ensaio, déronlle forma ó seu son ata elaborar un estilo propio.

A traxectoria musical do grupo comeza coas actuacións esporádicas en pequenos locais e festivais cercanos a Ferrol, ata consolidarse definitivamente con un concerto no XII Quantum Music Festival organizado polos alumnos da Facultade de Física de Santiago de Compostela, aló polo 2008.
Despois deste gran debut coma grupo propiamente dito, participamos la inauguración dos "Mércores Folk" da xa clausurada Sala RunRum; Contratáronnos coma músicos-actores no Asalto ó Castelo de Monterrei (Ourense), dous anos consecutivos; Colaboramos no "Festival Benéfico En Feminino" organizado por AECOFE no 2008; Quedamos como semifinalistas no Concurso Escenario PRAU 2010 de Cantabria; Entre outras actuacións, tamén tocamos  en lugares como Neda (Belelle Folk 2009), Lires (Cee 2011), Carballo (2011), e San Sadurniño (San Pipote 2011).

Destacamos neste ano:

-          Ferrol Lidera 16 Marzo 2012 (Ferrol). Accésit 100 €.

-          Finalistas Proyecto Runas 2012 Festival Internacional do Mundo Celta de Ortigueira.

-          Festival Irmandiño de Moeche

Actualmente temos gravada a nova maqueta gravada co persoal técnico de Groove Punch Studios e así ter máis oportunidades á hora de solicitar novas actuacións.

Os integrantes de Alén de Ancos son: Pablo Díaz [Gaita e Whistles], Fausto Escrigas (Saxo e Whistles) Rubén Gómez [Guitarra], Aitor Rodríguez [Percusións], Iago Casal [Teclado], Carlos Caaveiro [Uilleann pipe], e Dolores Melgar [Pandeireta].

Para coñecernos máis recomendamos que visiten a páxina www.facebook.com/alendeancos

Poden contactar con nós por correo electrónico alendeancos@gmail.com

 - - - - - - - - - - - - - - - - - - - - - - - - - - - -

Música folk con ritmos de rock e blues

Biografía

O Grupo Folc "ESTIMABA QUE VIÑERAS" nace alá polo ano 2007 en San Xoan de Piñeiro, Mugardos.

A súa música é unha mistura de pezas de gaita tradicionais co poemario galego e propio do noso país todo isto acicalado cun toquiño rock que lle aporta carácter á festa.

Os compoñentes veñen de distintos estilos musicais, o que lle aporta diversidade ao repertorio.

Ante todo son un grupo de amigos que gostan da música do país.

Contan xa cunha ampla cantidade de actuacións entre as que caben destacar algunhas de relevancia: "FESTIFOLK SAN XOAN DE PIÑEIRO" en Mugardos, "FESTIVAL DA TERRA E DA LINGUA" no Muiño de Pedroso-Narón, "FESTIVAL ANTROSPINOS" en Taragoña-Riaxo, "FESTIVAL SOLIDARIO, UNHA MAN POR HAITÍ" en Pontedeume, no "FESTIVAL IRMANDIÑO" de Moeche e nun sinfín de actuacións en festas e sociedades culturais da nosa bisbarra.

Compoñentes

Carliños, Tino, Andrés, Moncho, Mon. (fundadores e cando que eles queiran Rubén  e Serxio Platas), ademási o novo e flamante Guitarrista Gabi, e o estelar acordeoanista Diego Feal.

   

Rescate da concesión.-

O Concello secuestrará hoxe a concesión

de Porta Nova se non se retoma a limpeza .

 Venres, 06 de Xullo de 2012.

 redacción ferrol      .
O goberno local notificou na mañá de onte á empresa Fesuco, concesionaria da xestión do centro comercial Porta Nova, a obrigación de regularizar os contratos das compañías que prestan os servizos de mantemento e limpeza (Ssigatty) e vixilancia (Prosenorsa), rescindidos desde o pasado día 30 de xuño.

Os responsables de Ferorsa comunicaron por burofax a ambas as compañías esta decisión e, mentres que o persoal de limpeza non traballa desde o luns -desde a CIG indicaron que se enviou ao persoal de vacacións-, o da empresa de seguridade continuaba aínda onte desempeñando as súas funcións no centro comercial Porta Nova
 O concelleiro de Economía, Alejandro Langtry, lembrou que a concesionaria do servizo de xestión das mencionadas instalacións comerciais dispón de prazo até hoxe -pola mañá- para regularizar a situación. En caso contrario, tal como advertía o edil esta mesma semana, o Concello procederá a secuestrar a concesión pola vía de urxencia, o que lle permitirá facerse cargo da mesma durante un período determinado.
O Concello xa solicitou ao Consello Consultivo de Galicia un informe para que se pronuncie sobre a situación. Fesuco debe ao goberno local unha partida de 500.000 euros e o Consistorio xa lle comunicou a súa intención de recuperar a concesión do servizo. A falta de desistir desa adxudicación, a compañía presentou un recurso no que solicita á administración local unha indemnización por abandonar a xestión da área comercial.
Os comerciantes que operan en Porta Nova celebraron algunhas reunións -presentaron  esta semana un escrito no Concello para que tomase cartas no asunto- e denunciado publicamente a situación. De parte do colectivo situouse o concelleiro de Economía, Alejandro Langtry, que subliñou a necesidade de axilizar os trámites pendentes para recuperar canto antes a concesión da xestión de Porta Nova e pór fin a unha situación que afecta os empresarios desde o pasado luns.

Perda de empregos.-

O responsable comarcal da CIG Xesús Anxo López Pintos denunciou publicamente onte a "grave situación" pola que atravesa o centro comercial Porta Nova. Desde a central nacionalista advirten da posible perda de sete postos de traballo fixos, tres correspondentes ao servizo de mantemento e limpeza e catro na empresa de seguridade privada.

Diario de Ferrol.-

Porta Nova pide agora unha indemnización

polo rescate.

O centro comercial debe medio millón de euros ao Concello

Ana de Antonio

ferrol / a voz

05 de xullo de 2012               

Despois de que o Concello de Ferrol iniciase un expediente para rescatar a xestión do centro comercial Porta Nova, situado na praza do Inferniño, a empresa concesionaria da área comunicou a comezos desta semana que se opón a devandito trámite. É máis, segundo informou onte o concelleiro responsable de Economía, Alejandro Langtry, a empresa Fesuco solicitou ao Concello unha indemnización polo rescate que a administración local quere levar a cabo.

O edil confirmou onte que o Concello non está polo labor de outorgar subvención algunha á empresa concesionaria. Así pois, o Concello enviará o expediente do centro comercial ao consello consultivo para que estude que pasos pode emprender agora a administración local. Ademais, Alejandro Langtry informou de que o pasado martes os comerciantes de Porta Nova comunicaron ao Concello de que a firma concesionaria deixara de prestar os servizos de limpeza e seguridade desde o día un deste mesmo mes. Como consecuencia, indicou o edil, a administración local remitiu un requirimento á empresa para que nun prazo de 24 horas retome a normalidade. Neste asunto, explico Langtry, «o Concello vai actuar de forma contundente».

Auditoría

Entre tanto, o Concello traballa xa no prego de condicións do novo concurso que ten previsto convocar para adxudicar a futura xestión de Porta Nova unha vez Fesuco deixe este labor. O que si fixo xa a administración local é encargar unha auditoría para coñecer con exactitude a situación económica do centro comercial.

Do que polo momento non hai dúbida é de que a concesionaria debe ás arcas municipais medio millón de euros. Desde o pasado mes de abril, os comerciantes de Porta Nova abonan directamente os recibos ao Concello en lugar de facelo a través da xestora, como se facía ata ese momento.

A dirección de Fesuco declinou onte facer declaracións sobre este asunto.

«Desastre total»

Un dos afectados e propietario dunha xoiería en Porta Nova, Luis Fidalgo, denunciou indignado que a situación actual do centro comercial é de «desastre total», polo que el, do mesmo xeito que a maioría de comerciantes, decidiu o pasado ano botar o peche ata que mellore a situación.

La Voz de Galicia.-

FESUCO pide agora indemnizacións...

A empresa Fesuco solicita unha indemnización ao Concello para ceder a xestión de Porta Nova .

 Mércores, 04 de Xullo de 2012 00:00

 lorena romeu

 ferrol.
 A empresa concesionaria da xestión da área comercial de Porta Nova, Fesuco, oponse ao rescate, por parte do Concello, das instalacións. Así o confirmou o edil de Economía, Alejandro Langtry, que indicou que os representantes da compañía presentaron un recurso no que mostran o seu rexeitamento á proposta formulada hai unhas semanas polo goberno local para tratar de reflotar o centro comercial.

A débeda que desde hai varios meses mantén Fesuco coa administración ferrolá ascende a 500.000 euros, como se indicou desde o Concello.

O responsable da área de Economía do equipo de Rei Varela sinalou que no recurso presentado pola empresa, os representantes da mesma solicitan ao Consistorio unha indemnización por deixar de xestionar o centro comercial Porta Nova.

Na mañá de onte celebrouse unha reunión nas propias instalacións, á que asistiron comerciantes das instalacións e persoal de Fesuco, e na que estes últimos xa comunicaron, segundo fontes consultadas por este diario, que "non entregan voluntariamente nada porque entenden que teñen moito que gañar e nada que perder". Así as cousas, o goberno local xa anunciou que tomará cartas no asunto para pór fin a un proceso no que, segundo incidiuse desde o Consistorio, os principais prexudicados son os comerciantes.
Nos próximos días, tal como asegurou o concelleiro Alejandro Langtry, solicitarase un informe ao Consello Consultivo "para recuperar a área de Porta Nova". O máximo responsable de Economía no Concello confía en recuperar canto antes as instalacións aínda que lamentou que o feito de que Fesuco non acepte o rescate dilatará o proceso no tempo.

Concesión

O Concello ferrolán adxudicou no ano 1999 á empresa Fesuco a xestión da área comercial de Porta Nova. Agora o goberno local prevé axilizar o expediente que lle permitirá recuperar as instalacións para, posteriormente, proceder a sacar novamente a concurso a xestión do centro. Os comerciantes que operan no local "están ocupados menos dunha decena do vinte postos dispoñibles" xa advertiron ao Concello da necesidade de que a empresa que resulte concesionaria do servizo presente solvencia económica, esixindo as pertinentes fianzas á compañía para evitar futuros problemas.

O centro comercial Porta Nova inaugurouse no ano 1995 e a firma Gepersa asumiu a xestión. Problemas económicos obrigaron ao goberno local a sacar de novo a concurso o servizo, uns trámites que agora terá que realizar por terceira ocasión desde a inauguración das instalacións.

Diario de Ferrol.-

Parcelas abandonadas.-

A A. Veciñal O Rosario-Inferniño

esixe a limpeza de parcelas.


 Domingo, 24 de Xuño de 2012.

 lorena romeu

ferrol

A Asociación Veciñal O Rosario-Inferniño denunciou publicamente o estado de abandono que presentan algunhas parcelas localizadas no barrio. O colectivo menciona nun escrito -que prevé presentar a próxima semana no rexistro do Concello- os casos dun terreo situado na Rúa Pintor Pérez Villamil, nas inmediacións do Hotel Hesperia, e outra nas proximidades da estrada de Castela, xunto ás casas de Cachaza. Trátase dos dous exemplos, indican, máis relevantes pero non dos únicos nos que se evidencia a falta de limpeza.

A entidade veciñal de O Rosario-Inferniño esixe a intervención dos responsables municipais para solucionar o problema. Respecto diso, desde a A.Veciñal inciden en que tanto os propietarios dos terreos como os representantes do equipo de goberno ferrolán teñen unha serie de obrigacións, os primeiros en materia de conservación das súas parcelas e os segundos, lembraron, no cumprimento da normativa na que se regula o estado en que deben manterse esas propiedades.

Nalgúns casos as parcelas non teñen maleza pero acumulan unha gran variedade de restos, o que as converte, aseguran, en "vertedoiros incontrolados" en pleno centro da cidade.

A situación complícase naqueles casos nos que, ademais de restos, a maleza invade as propiedades, converténdose nun foco de infeccións. Desde a entidade veciñal O Rosario-Inferniño alúdese especificamente ao caso dunha superficie localizada na zona de Río do Tronco, xunto ao  colexio Belén, onde as ratas, denuncian, campan ás súas anchas.

Diario de Ferrol.-

FESUCO - Xulgado admite a trámite concurso acredores

O Concello abre o expediente para rescatar Porta Nova.

O xulgado admite a trámite a petición

de concurso de acredores para Fesuco.

F. Fernández

ferrol / a voz 20 de xuño de 2012.

O Concello de Ferrol iniciou o expediente para rescatar a xestión do centro comercial Porta Nova, situado na praza do Inferniño, segundo confirmou onte o concelleiro de Economía, Alejandro Langtry.

 O goberno local puido dar xa ese paso unha vez que o xulgado de Ferrol admitiu a trámite a petición da actual concesionaria, Fesuco, para entrar en concurso de acredores. Ademais, o xulgado nomeou a un administrador concursal para dirixir todo o procedemento de suspensión de pagamentos.

Langtry explicou que agora, unha vez aberto o expediente, concede un prazo de dez días á empresa para que acepte, ou non, o rescate da xestión. É o que marca a lei, pero o edil sinalou que Fesuco non debería oporse, pois recentemente as dúas partes alcanzaran unha especie de acordo para resolver a relación contractual de mutuo acordo. Se finalmente é así, o expediente rematarase con rapidez, aínda que o edil non quixo adiantar prazos.

Entre tanto, o Concello traballa nos pregos do novo concurso que ten previsto convocar para adxudicar a xestión de Porta Nova. Ao mesmo tempo, Langtry adiantou que están realizando unha auditoría no centro comercial para coñecer con exactitude a situación económica do centro.

O concelleiro de Economía destacou que o Concello seguramente non terá que indemnizar a Fesuco polo rescate das instalacións comerciais do Inferniño. Esta decisión adoptouse hai uns meses tras destaparse que a concesionaria debía medio millón de euros ás arcas municipais. Desde abril, os comerciantes de Porta Nova abonan directamente os recibos ao Concello, en lugar de facelo a través da xestora, como era habitual.

La Voz de Galicia.-

RESCATE- FESUCO debe responder.-

Fesuco debe pronunciarse este mes

sobre o rescate da área de Porta Nova .

 Mércores, 20 de Xuño de 2012 00:00
 lorena romeu
Ferrol

 A empresa Fesuco, concesionaria desde o ano 1999 da xestión da área comercial de Porta Nova e en concurso de acredores, dispón dun prazo de dez días para comunicar ao goberno local se acepta ou non o rescate da concesión por parte do Concello, tras acumular unha débeda coas arcas locais de 500.000 euros. Así o indicou onte o concelleiro de Economía, Alejandro Langtry, que anunciou que xa se procedeu a iniciar o expediente para a recuperación das instalacións, no que respecta á concesión da área comercial.

O concelleiro ferrolán indicou que unha vez que o administrador único nomeado pola sociedade comunique ao Consistorio de modo oficial o seu posicionamento, o goberno local iniciará os trámites pertinentes para proceder a sacar de novo a concurso a xestión do Centro Comercial Porta Nova, onde actualmente están ocupados sete do vinte locais dispoñibles.

Até o momento en que se resolva a nova licitación pública para a explotación das instalacións o Concello ferrolán asumirá a súa xestión. Nos 17 anos de existencia do centro, esta é a segunda ocasión na que o goberno local ten que tomar cartas no asunto. O primeiro ano da súa apertura, en 1995, a concesionaria do servizo, a firma Gepersa, tamén acumulou débedas co Concello, polo que tivo que convocarse un novo concurso, que gañou a empresa Fesuco.

Ante esta traxectoria, os comerciantes do centro advertiron ao goberno local da necesidade de que a nova adxudicataria presente a solvencia necesaria para garantir a xestión futura da área de Porta Nova.

 Para iso, reclaman que se esixan fianzas e poder participar activamente no proceso de concesión.

Diario de Ferrol.-

Actuacións Plataforma

A Plataforma en contra do despilafarro de diñeiro público, informamos que presentaremosesta mañá ás 13 h. no Rexistro Municipal a seguinte  proposta para o seu debate e aprobación no Pleno Municipal a través dos grupos municipais da oposición.

Informamos que onte, luns atarde, mantivemos un encontro cos responsables de Comerciantes de Novo Ferrol e representante do Centro Comercial Aberto A Magdalena para trasladarlles a nosa oposición a estas obras. Intercambiamos diversas informacións e opinións sobre a inconveniencia desta innecesaria actuación habendo puntos de coincidencia no que se refire  as prioridades dos diferentes barrios da cidade, programas sociais e outras actuacións de infraestruturas.

Continuaremos coas actuacións anunciadas co fin de evitar unhas novas obras innecesarias na superficie da Praza de España, entre as que anunciamos a RECOLLIDA DE SINATURAS este vindeiro MÉRCORES-20 a partir das 10,30 h da mañá na mesma Praza de España.

O goberno segue adiante coa súa decisión sen escoitar á cidadanía, a pesar de que o Alcalde presume ante todo de ser o artífice da participación cidadá no noso Concello.

Ante esta situación, os cidadáns non estamos dispostos a que se despilfarre o diñeiro público e consideramos unha irresponsabilidade por parte deste goberno seguir adiante co seu proxecto.

Continuaremos informando das accións a tomar por esta plataforma de oposición a esta proxecto concreto  na Praza de España.

Saúdos

A Plataforma.-

Planta de Gas -Reganosa-ilegal

Manifestación e satisfacción pola Sentenza do Tribunal Supremo contra a Planta de Gas de Reganosa e o concello de Mugardos.

Acto reivindicativo contra a Planta de gas fronte á Casa do Concello de Ferrol.

Rexeitamos as palabras despectivas do Alcalde de Mugardos, pertencente ao BNG. En quince días solucionaremos o fallo do tribunal cun novo informe do PXOU de Mugardos para arranxar a Planta de gas....

CONSULTA POPULAR DA PRAZA DE ESPAÑA.-

Piden que se celebre unha consulta popular

sobre as obras da praza de España .

 Venres, 15 de Xuño de 2012.

  As doce entidades que, xunto con persoas a título individual, constituíron un colectivo opositor ás obras da praza de España, acordaron na reunión que celebraron o pasado mércores iniciar unha recollida de firmas para apoiar a petición de convocatoria dunha Consulta Popular en relación con este investimento.

          Será a partir da próxima semana cando se empecen a solicitar estes apoios e a petición apoiarase no artigo 24 do Regulamento de Participación Cidadá.

 Así, o mércores día 20 realizarase unha recollida de firmas a partir das 10.30 horas na propia praza de España.

        Paralelamente, pedirase aos grupos municipais da oposición que presenten unha moción ao pleno ordinario de fin de mes para evitar que se materialice este proxecto.

As entidades que se opoñen ás obras - as asociacións de veciños de San Xurxo, Esteiro, San Pablo-Catabois, O Rosario-Inferniño, Prioriño, San Román, San Xoán-Bertón, Santa Mariña e Ultramar, as culturais López Bouza , Fuco Buxán e o Colectivo Ártabra 21- prevén tamén levar a cabo outras medidas de presión e mobilizacións que anunciarán oportunamente, pois entenden que é preciso evitar que o goberno local levante de novo a praza de España.

    As asociacións oponse a que se invistan outros 700.000 euros neste espazo -máis 56.000 do proxecto- e aseguran que se gastaron xa 16 millóns nos últimos anos, incluíndo o pago de indemnizacións a empresas privadas con diñeiro público.

  O colectivo insiste no que xa manifestou ao alcalde, José Manuel Rei Varela, na entrevista mantida hai uns días, que consideran a praza finalizada salvo certos arranxos necesarios nas proximidades da rúa Rochel.

 Lembran que o propio rexedor municipal recoñeceu o mal estado dos barrios da cidade e que se lle pediu que se actúe con rapidez en zonas como a rúa do Sol, o túnel da praza de España, Irmandiños, o Callao, o Cantón, o parque Reina Sofía e a praza de Armas, entre outras rúas nas que considerarían mellor investidos os 700.000 euros

Diario de Ferrol.-

Entrevista Alcalde - Praza de españa

Colectivo Defensa dos Espazos Públicos de Ferrol , entrevistouse

co Sr. Alcalde para rexeitar o novo proxecto da Praza de España.

Ferrol, a 8 de xuño de 2012.-

Unha representación do Colectivo Espazos Públicos de Ferrol, composta por doce Asociacións veciñais e entidades sociais desta cidade de Ferrol, mantivo esta mañá unha audiencia co Sr. Alcalde de Ferrol co fin de manifestar a nosa oposición ao novo proxecto da superficie da Praza de España, presentado polo goberno local a cidadanía hai varias semanas.

Manifestamos que nestes momentos consideramos rematada a superficie da Praza de España. Fixemos entrega persoal dun documento para explicar as nosas razóns e total rexeitamento a esta insistente e interminable campo de probas na superficie da Praza de España. Esperamos que o goberno local aproveite todos estes recursos e enerxías para solucionar problemas de infraestruturas nos barrios e de tipo social.

Lembramos que na superficie desta Praza de España existe un acordo de Participación Cidadá para destinar os locais con funcionalidade de caracter social, sala de exposicións, charlas e reunións. Outro problema cara o tráfico é a reparación do TUNEL e Rúa Rochel.

Indicamos ao Sr. Alcalde que non nos corresponde ao movemento veciñal manifestar o destino que debe ter o espazo soterrado desta Praza, polo que deben ser outros foros os que debatan as súas posibilidades.

Rematamos a entrevista pedindo ao Alcalde un compromiso claro para que rectifique e esperando que non inicien unhas obras innecesarias.

 

Ferrol a 8 de xuño de 2012.

Investimentos públicos do concello.-

O crédito para financiar os investimentos de

2012 pedirase a seis meses de final de ano.

Mércores, 30 de Maio de 2012 00:00 .

redacción > ferrol

O Concello de Ferrol recorrerá nas próximas semanas a unha nova operación de crédito por importe de 1,7 millóns de euros. O expediente para pechar o acordo presentouse onte no transcurso da Comisión de Economía, presidida polo concelleiro Alejandro Langtry. O goberno local acometerá con cargo a esa partida -e algúns fondos propios- a totalidade dos investimentos reais contempladas no orzamento de 2012.

No mencionado documento, aprobado polo equipo de Rei Varela e que tamén apoiou o portavoz de IF, Juan Fernández, contémplan actuacións para este ano por un importe de algo máis de tres millóns de euros. Desa partida, 1,7 financiaranse con cargo a ese novo crédito que se solicitará a seis meses do peche do exercicio.

As obras pendentes de executar nas instalacións do parque municipal Raíña Sofía recibirán unha partida duns 470.000 euros con cargo a este crédito. O goberno local decidiu licitar novamente o proxecto básico e de execución para mellorar a accesibilidade ás instalacións, rexeitando a proposta defendida polo equipo do exalcalde Vicente Irisarri. Entre as actuacións de maior relevancia incluídas na relación de obras a executar con cargo a este crédito de 1,7 millóns atópanse tamén a conexión da rúa Máximo Ramos con Miramar e Estrela, en Canido, dotada con 390.000 euros, e o proxecto de mellora da praza do Callao, con 322.000 euros.

Así mesmo, a mencionada operación permitirá ao Consistorio acometer o proxecto da Costa de Mella, onde o equipo de Rei Varela prevé investir 300.000 euros para habilitar un centro de interpretación histórica, nos locais baleiros. Esta obra contémplase dentro da iniciativa de Abrir Ferrol ao Mar. As obras da rúa Máximo Ramos -195.000 euros-; un carril bici -190.000-; o plan de humanización de barrios -300.000-; a adquisición de terreos do cemiterio -200.000- e as expropiacións pendentes de executar -300.000- levarán a maior parte do importe da nova operación crediticia.

Na relación de investimentos reais correspondentes ao presente exercicio contémplanse ademais outras actuacións, aínda que menos custosas que as anteriormente mencionadas. Entre elas figuran, tal como recóllese no orzamento municipal compras de equipamento informático, mobiliario, sistemas de detección de incendios, sinalización, o anteproxecto de urbanización da praza de Armas -70.000 euros- ; a rehabilitación do antigo Hospicio -30.000 euros-; o POS 2012 -algo máis de 53.000-; investimentos en iluminación, sistemas de microchips de mascotas e o parque de educación viaria, entre outras actuacións.

Diario de Ferrol.-

Xuntanza Alcalde- Previos

A AVV de Esteiro acollerá o día 1 unha reunión

para abordar as obras da praza de España .

Martes, 29 de Maio de 2012.
redacción > ferrol

O colectivo de entidades sociais en Defensa dos Espazos Públicos de Ferrol anunciou a celebración dunha próxima reunión, este venres, no local da Asociación Veciñal de Esteiro. A convocatoria fixouse para as sete da tarde e na mesma, os asistentes tratarán de perfilar os puntos da reunión que manterán co alcalde da cidade, José Manuel Rei, o próximo día 8 na casa do Concello ferrolán.

O colectivo anunciou novamente a súa oposición ao plan anunciado polo goberno local para acometer unhas obras na praza de España, destinando un investimento de 700.000 euros aos traballos proxectados. O pasado mes de marzo, un centenar de persoas secundaron o chamamento dalgunhas entidades de veciños e sociais da cidade para concentrarse na propia praza para mostrar o seu rexeitamento a ese novo investimento na zona. A arquitecta e paisaxista Isabel Aguirre entregará o próximo mes de xullo o proxecto final da intervención a executar.

"Estamos en contra de calquera actuación na superficie da Praza de España, a cal damos por rematada, agás a parte soterrada", aseguran as entidades agrupadas para defender os espazos públicos da cidade. Así mesmo, estas instan aos mandatarios municipais a "cumprir o acordo para os locais de superficie, destinándoos a fins sociais, como un Foro Social, charlas, exposicións, etc."..

Diario de Ferrol.-

 

Convocatoria Asemblea barrio do Inferniño.-

CONVOCATORIA ASEMBLEA DE BARRIO-INFERNIÑO

    A Xunta directiva desta Asociación Veciñal O Rosario –Inferniño, comunica que ante o preocupante aumento de inseguridade cidadá en varios puntos concretos deste barrio do Inferniño,  instamos aos responsables municipais a poñer fin a unha situación de crecente preocupación cidadá.

      Este barrio do Inferniño foi sempre foi considerado un barrio tranquilo, de  pacífica convivencia social e de traballadores. Mención aparte merece a Praza do Inferniño por ser un lugar de encontro da infancia, familias e maiores polo que esperamos dos responsables municipais a máxima dedicación e protección para este espazo público.

     A veciñanza é coñecedora dos puntos conflitivos de lugares de trapicheos, atracos, roubos a hostalaría e pisos,  ruídos nocturnos...etc, polo que pensamos existe unha xustificada preocupación social para que a cidadanía poda expresarse nunha asemblea aberta.

    Lembramos tamén o artigo 33. 2 do RPC, onde indica da necesidade de elaborar un Regulamento INTERNO de Funcionamento polo que presentaremos un borrador  para o seu debate ante esta Asemblea.

       Por todo isto, esta Asociación Veciñal,  insta ao concello e vice -presidentes de asemblea a CONVOCAR unha ASEMBLEA DE BARRIO do INFERNIÑO con caracter urxente para os vindeiros días co fin de tratar a SEGURIDADE CIDADÁ, así como o debate sobre un REGULAMENTO INTERNO de Funcionamento desta Asemblea de Barrio do Inferniño.

Ferrol, 23 de maio de 2012.

            - A directiva.-

-SR. ALCALDE –PRESIDENTE CONCELLO DE FERROL.-

--