-O pleno apoia de forma unánime o novo Regulamento deParticipación Cidadá.
Xosé Manuel Sanxoán interveu polos veciños ao comezo da sesión.-
D. A. DAVID RUIBAL GARCÍA > FERROL
O pleno do Concello de Ferrol deu luz verde onte ao novo Regulamento de Participación Cidadá, trece anos despois de que a cidade se conviertiera na primeira de España en contar cunha norma deste tipo.
O texto onte ratificado foi consensuado de xeito colectivo polos propios veciños.
A unanimidade coa que saíu adiante o novo Regulamento de Participación Cidadá e a música do quintento de clarinete da Banda de Musica Ferrolá coa que, de forma excepcional nunha sesión plenaria, púxose fin á reunión da corporación municipal poden levar a pensar que o de onte foi un debate sosegado e sen reproches.
Pero non foi así e o público que practicamente encheu o salón de plenos escoitou pullas.
Os primeiros en polas de manifesto foron os dous representantes veciñais que interviñeron ao comezo da sesión para defender o documento: Miguel López, da A. Veciñal Fontelonga de Esteiro, e Xosé Manuel Sanxoán, da Asociación Veciñal O Rosario-Inferniño.
Estes responsabilizaron directamente ao secretario do Concello de paralizar a súa aprobación durante meses, nunha actitude, para nós, pouco entendible.
Recordaron, neste sentido, que o texto leva esperando para a súa aprobación en pleno desde outubro do ano pasado á espera de que o secretario lle dea validez legal.
Os veciños queren ademais que este regulamento non sexa simplemente un documento escrito, e para iso reclamaron importantes partidas económicas para poñelo en marcha.
De paralización inxustificada tamén falou a portavoz de EU, Yolanda Díaz, quen botou en cara ao alcalde que desde que os veciños/as terminaron o regulamento ata o seu debate no pleno de onte transcorran nove meses. O parto foi a termo, concluíu.
A edila de EU defendeu, así mesmo, o traballo realizado pola súa formación na negociación dos orzamentos de 2009 co grupo de goberno para que estes recolleran por primeira vez os
Orzamentos Participativos, un dos acordos do
foro cívico no que os
veciñ@s consensuaron en outubro do ano pasado a nova ordenanza de Participación Cidadá, apuntou.
Díaz citou ao premio Nobel José Saramago e ao xornalista Ignacio Ramonet para afirmar que a utopía é posible, asegurando que o proceso de participación iniciado vai cambiar o rumbo da cidade.
Advertiu, para rematar, de que sería un grave erro que o regulamento quede en papel mollado ou gardado nun caixón e frustar así as expectativas da cidadanía.
Nesta idea insistiron todos os grupos municipais. Así, José Manuel Rei, do PP, indicou que non chega coa aprobación do regulamento, senón que escoitar ás persoas debe rexer a acción diaria dos políticos.
Unha actitude que o portavoz popular dixo non atopar no goberno local, a quen acusou de adoptar decisións que non favorecen a participación dos grupos municipais, como a redución das comisións informativas, ou o intento de aprobar a Lei de Grandes Cidades coa intención, na súa opinión, de recortar o papel da oposición.
Pola súa banda, o BNG lamentou que teñan que pasar dez anos para reformar o ata onte vixente regulamento de Participación Cidadá, pero a pesar desta demora esta é unha data festiva, manifestou a edila Elia Rico, que definiu o novo texto como un instrumento de traballo social aberto ás novas realidades e para a construción dun futuro máis xusto, democrático e asentado no que somos.
Pola súa banda, o concelleiro de Participación Cidadá, Manuel Santiago, subliñou o consenso co que conta o regulamento, asegurando que é ou máis avanzado de Galicia e está á vangarda de España. Nesta liña, destacou o feito de que abra por primeira vez a participación aos maiores de 16 anos e a creación de novas figuras, como a do Defensor da Cidadanía.
Tamén apuntou que suporá unha modernización da administración local, que terá que prepararse para responder en tempo e forma ás demandas da veciñanza.
O pleno pechouno o alcalde, quen se manifestou orgulloso do traballo realizado pola veciñanza asegurando que a democracia ou é participativa ou non é democracia. Vicente Irisarri sinalou que os 25 concelleiros da corporación cremos firmenente na participación cidadá, e que o regulamento onte aprobado é de toda a cidadanía e non dous grupos municipais, comprometéndose a aplicalo nos dous anos que lle restan de mandato.
Diario de Ferrol.-
.jpg)
